Kua whakawhiwhia tētahi whakatairanga, i kitea te 1 i te 5 o Ngāi Aotearoa e whai wāhi atu ana ki Te Wā Tuku Reo Māori, ki ngā tohu nui whakaharahara ā-ao e rua mō te whakawhitiwhiti kōrero.

I whakaingoatia ko Te Taura Whiri i te Reo Māori me tētahi whakahaere ā-rautaki matihiko, ko For Purpose hei toa whakaihuwaka mō te Tino Kaupapa Whakatairanga ā-Ao (ā-motu) me te Tino Paetukutuku ā-Ao, ki Washington DC i te ata nei.

“E noho whakaiti ana mātou i te hononga mai o Ngāi Aotearoa, kotahi miriona neke atu te rahinga, kia hua mai ai te hui whakanui nui rawa i te ao o tō tātou reo, ā, kua hūmārie anō mātou  i tēnei whakawhiwhinga i te aroaro o te ao,” te kī a Ngahiwi Apanui, Tumu Whakahaere o Te Taura Whiri i te Reo Māori.

“He kapa ririki mātou e kaingākau nui ana ki te reo Māori me tōna anamata i Aotearoa nei. E noho ngākau whakaute ana mātou ki ō mātou hoa i For Purpose, nā rātou mātou i tautoko ki ngā pūkenga i āhei ai tā mātou takahi i te ara hītori i tērā tau.”

I te whakaritenga o tētahi huarahi hei whakanui i Te Wiki o Te Reo Māori i te wā o te urutā KOWEHORI-19, i hoahoatia e te Komihana tētahi whakatairanga ka tū ahakoa te aha. I te Rāhina, 14 o Mahuru 2020, i te wā tonu i whakatakotohia te petihana ki te aroaro o te Pāremata i ngā tau whā tekau mā iwa ki muri: Koni atu i te kotahi miriona o tātou ake o Ngāi Aotearoa i tū ki te whakanui i te reo Māori mā te tikanga ake o tēnā, o tēnā, ahakoa i hea tātou.

Mai i a Kate i Waihi, nāna i te tono kawhe ki te reo Māori, ki te kaimahi pūtahi waea a Pradeep i rāhiritia ngā kaikaranga ki te kīnga “Kia ora”, tae noa mai ki ngā tari kāwanatanga, ngā whakahaere, me ngā kura i tū ki te waiata i ngā waiata Māori: i tērā tau, koni atu i te kotahi miriona tāngata o Aotearoa, ahakoa kei hea, ahakoa nō hea, i hono tahi mai ki te kaupapa reo Māori e haere ake nei,” te kī a Ahorangi Rawinia Higgins, Toihau o Te Taura Whiri i te Reo Māori.

“He mea matua te panonitanga waiaro ki te whakarauoratanga o te reo Māori, ā, nā Te Wā Tuku Māori o tērā tau i tohu ai te panoni whānui o ngā waiaro o te iwi o Ngāi Aotearoa. E mihi ana mātou ki ngā tāngata katoa i tū tira mai ki a mātou i tērā tau, tae atu hoki ki ō tātou mumu reo kua roa nei e para ana i te huarahi mā tātou, me kī, nā tātou katoa ēnei tohu. Kia kaha te reo Māori!”

He mea whakahaere Ngā Tohu Reed e Campaigns & Elections, ā, ka whakahōnore ngā tohu i ngā tino mahi taunaki taketake, me ngā kaupapa whakatairanga pāpori puta noa i te ao.

Hononga whaipānga:

• Best International Website: www.tuku.reomāori.co.nz 
• Reed Awards finalists