Kua whakapāngia kētia te tini me te mano o Ngāi Aotearoa e tētahi whakatairanga Matariki, he mea hoahoa hei whakaemi tāngata mā te reo Māori me ngā reo tīpuna katoa o ngā tāngata o Aotearoa.

“He tikanga hōhonu a Matariki nō tuawhakarere e tūhonohono nei i a Ngāi Māori ki ō tātou tīpuna. I hiahia mātou kia haere kōtui te tūhonohono a ngā tāngata o Aotearoa ki ō rātou tīpuna me te ako i te reo Māori i te wā kotahi. Nō reira i whakamāoritia, ā, i hopukia hoki tō mātou whakataukī, tō mātou Kaikōhau motuhake, ki ngā reo maha: te reo Airihi, te reo Hāmoa, te reo Kariki, te reo Haina, te reo Whītī, te reo Pāniora me te reo rotarota,” te kī a te Toihau o Te Taura Whiri i te Reo Māori, a Ahorangi Rawinia Higgins.

“Mehemea rānei kua manomano tau ō tīpuna e noho ana ki konei, he tauhou rānei koe ki Aotearoa: pēnei ki te wāhi o te reo Māori hei reo ā-motu, he tikanga ā-motu hou a Matariki mō tātou ināianei.”

Ka ara ana te kāhui o Matariki, he tikanga taketake te whakaemi a te tangata ki te kaitahi, ki te huritao mō te wā kua hipa me te whakatika mō ngā rā ki tua. Kua whakaritea e Te Taura Whiri ētahi mahi pārekareka, ngāwari hoki, e whai wāhi mai ai te tangata takitahi, ngā wāhi mahi, ngā kura, ngā whānau me ngā hapori:

Te whakauwhi #Kaitahi – te kai tahi. Whakaritea tētahi ‘Kaitahi Matariki’; me tuku kai ki ngā pātaka kai, me puta rānei ki te kai hei āwhina i te ahumahi manaaki.

Te ako #Kaikōhau – he whakapuakitanga wawata. Te ako me te taki i tētahi Kaikōhau.

“E mōhiotia ana a Matariki mō te whakaemi tāngata: Matariki Hunga Nui. E tūmanako ana mātou ka whakakotahi tonu tēnei i ngā tāngata o Aotearoa, pēnei ki te reo Māori i tērā tau, i neke atu i te kotahi miriona tāngata i Aotearoa i whakakotahi ki te whakanui i te reo Māori mō Te Wā Tuku Reo Māori”, te kī a te Tumu Whakahaere, a Ngahiwi Apanui.

“Kua rua tekau tau tō mātou whakahaere e tautoko ana i ngā karanga a ētahi kia whakarauoratia a Matariki hei kaupapa ā-motu hou. E hiahia ana mātou kia whai wāhi mai ai tēnei tikanga ki ngā tāngata katoa o Aotearoa.”

Kei te paetukutuku o www.reomaori.co.nz tēnei whakatairanga kotahi marama te roa o Matariki, ā, nō te mutunga o te wiki tuatahi kua whai wāhi kē mai te mano tini tāngata mai, whakahaere mai anō hoki.

Hononga whaipānga:

- Matariki 2021
- Te ako kaikōhau