Ngā Tohu Reo Māori 2025 – Te whakanui i ngā toa o te reo Māori

He rā nui ka whakanuia ai ngā toa o te reo Māori.

I tēnei tau, e waru ngā toa i whakanuia ki Ngā Tohu Reo Māori puta noa i ngā wāhanga e whitu kua whakahoutia, otirā i tū te pō hirahira nei ki Te Papa Tongarewa i Te Whanganui-a-Tara.

Ko Te Taura Whiri i te Reo Māori ngā kaihautū o Ngā Tohu Reo Māori, e whakanui ana i ngā tāngata me ngā rōpū e kōkiri nei i te whakataunoatanga me te whakarauoratanga o te reo Māori. Mai i ngā akomanga ki ngā papa hākinakina, ā, mai i ngā hapori ki ngā wāhi matihiko, ka whakamaharatia tātou e ngā kaiwhiwhi o tēnei tau, ka ora te reo i te wā ka kōrerotia, ka kitea, ā, ka rangona i ia rā.

"He hōnore nui ki a mātou ki te whakanui i te hunga ārahi, whakaohooho, tārai hoki i tētahi anamata mō te reo Māori," te kī a te Tumu Whakahaere o Te Taura Whiri i te Reo Māori, a Ngahiwi Apanui-Barr. "E whakaatu ana ā rātou mahi ko te oranga o te reo, ko te whakamahinga i ia rā, ko te aroha, ā, me te whakaaro tapatahi."

Tokowaru ngā kaiwhiwhi i whakanuia mō tō rātou wairua auaha, te hautūtanga, me te pūmautanga tauroa ki te reo Māori. Ko tētahi o rātou, ko Piripi Walker, he matakīrea mārire i te ao pāpāho Māori, he matakōkiri reo hoki, ā, me Lorraine "Nanny Lolo" Hale, he kōtuku noho awa o te kōhanga reo, me te ako ā-whānau tuku iho.

E whakamihi atu ana a Te Taura Whiri i te Reo Māori ki te tautoko moroki a Te Māngai Pāho, Whakaata Māori, Te Tāhuhu o te Mātauranga, Fonterra, Te Puni Kōkiri, Toi Aotearoa, Te Matatini me Te Mātāwai.

Pānui

Te Tohu Oranga Angitu

Piripi Walker (Ngāti Raukawa ki te Tonga)

I whakamānawatia mō te hia ngahurutau o te manawanui ki te whakarauora i te reo Māori. Ko ia tētahi o ngā tāngata nāna a Te Upoko o te Ika i whakatū, ā, he kiritoa o te kerēme Wai 11, nā te hautūtanga o Piripi ētahi panoni rongonui i whakaū, ā, me te whakaawe hoki i ngā whakatipuranga maha ki te hāpai tonu i te reo Māori.

Tū Rangatira

Lorraine “Nanny Lolo” Pirihira Hale (Ngāti Awa)

I whakamānawatia mō āna whakaratonga, neke atu i te 40 tau te roa, ki te reo Māori mā roto i Te Kōhanga Reo o Te Teko, ā, me te Poari Matua hoki o Te Kōhanga Reo. Nā tana aroha me tana ngākau titikaha i poipoi i ngā tini whakatipuranga tamariki me ngā whānau ki te whakaoreore me te ako i te reo i ia rā.

Ngā Kaiwhiwhi Tohu 2025

Piripi Walker
Te Tohu Oranga Angitu. Kaitautoko: Te Mātāwai.
Lorraine “Nanny Lolo” Pirihira Hale (Ngāti Awa)
Tū Rangatira. Kaitautoko: Te Matatini.
Auckland Transport
He Tohu mō te Reo Ora. Kaitautoko: Te Māngai Pāho.
Aukaha News
He Tohu mō te Reo Ora. Kautautoko: Te Māngai Pāho.
Arataua Media
He Tohu mō te Whakaaweawe i te Reo. Kaitautoko: Te Tāhuhu o te Mātauranga.
Hākinakina Rangatahi – NZ Sports Collective
He Tohu mō te Whakarangatira i te Reo. Kaitautoko: Whakaata Māori.
Tākuta Hona Black
He Tohu mō te Whakapiki i te Reo. Kaitautoko: Te Puni Kōkiri.
Te Tira Kaiwhakamāori - Te Reo Māori ki Parī 2024
He Tohu mō te Whakahihiri i te Reo. Kaitautoko: Creative NZ.

Ngā Kaitautoko

Te Māngai Paho
He hinonga reo Māori a Te Māngai Pāho e whakatairanga ana i te reo Māori me te ahurea Māori mā te tautoko ā-pūtea nei i ngā kaiwaihanga me ngā kaiwhakarato i ngā kaupapa mō te reo me ngā tikanga. Ko te whāinga matua o Te Māngai Pāho, kia māhorahora te reo Māori.  
Ministry of Education
He mea nui te mātauranga i roto i ngā mahi whakarauora i te reo Māori huri noa i ngā rāngai katoa. E whakahī ana a Te Tāhuhu o te Mātauranga ki te tautoko i te reo Māori mā te mātauranga, kia tokomaha ake ngā tamariki e te ako ana i te reo, mā te reo hoki.   
Fonterra
E poho kererū ana a Fonterra, arā, ko Te Mātāpuna i te reo Māori, ki te tautoko i Ngā Tohu Reo Māori me te whakanui hoki i te hunga katoa e arataki ana, e whakaohooho ana hoki i te whakarauoratanga o te reo tuatahi o tō tātou motu. 
Whakaata Māori
Ko Whakaata Māori te whare pāpāho taketake o Aotearoa, e ū ana ki te whakarauora i te reo, i te ahurea me te tuakiri Māori mā te arapāho, me te whai kia toiora, kia mauriora te reo, i ngā wā katoa, i ngā wāhi katoa. 
Te Puni Kōkiri
He wāhi nui tō te reo Māori ki te ahurea me te tuakiri motuhake o tō tātou whenua, nā reira e poho kererū ana Te Puni Kōkiri ki te tautoko i Ngā Tohu Reo Māori 2025 ki te whakanui i te hunga whakaaweawe e whakapau kaha ana ki ngā mahi whakarauora i te reo Māori.
Te Matatini
He taiao whakareinga te Taiopenga-ā-motu o Te Matatini e whakataunoa ana, e whakanui ana hoki i te reo mā te kapa haka, nā reira e poho kererū ana a Te Matatini Society Incorporated ki te tautoko i Ngā Tohu Reo Māori 2025. 
Te Mātāwai
Ko tā Te Mātāwai he whakamana anō hoki i ngā iwi Māori ki te whakarauora i te reo hei reo ūkaipō i ngā kāinga me ngā hapori mā te tiaki, te whakatairanga me te whakahaumanu i te reo mā te mahi tahi, mā te arataki, mā te whakaaweawe, mā te haumi kaupapa reo hoki.   
Creative NZ
Ko Toi Aotearoa te pūtahi whakawhanake toi-ā-motu o Aotearoa. E whakanui ana a Toi Aotearoa i ngā kaiwhiwhi toa o Ngā Tohu Reo Māori 2025, e poho kererū ana hoki mātou ki te hāpai i te oranga tonutanga o te reo Māori mā roto mai i ngā toi.