Kua rere te karanga! Kei te karanga Te Taura Whiri i te Reo Māori, kia tautapatia te hunga toa e ārahi ana i te whakarauoratanga me te whakamāoritanga o te reo Māori – kia whakanuia rātou ki Ngā Tohu Reo Māori 2025.   

I tēnei tau, kua whakahāngaitia ngā tohu ki ngā pou e rima o te whakarauora reo, e whakaaetia ana puta noa i te ao, ā, ka noho tonu ngā tohu tāukiuki, arā  te Tohu Oranga Angitu me te tohu Tū Rangatira.   

Ko ngā tohu hou e whakaata ana i te huinga katoa o te mahi o ia rā, o ia wiki, i ia marama anō hoki a ngā kainoho ki Aotearoa hei hāpai i te reo Māori – mai i te whakaawe i te hunga ako ki te whakamahi i te reo Māori i ia rā, ki te whakarangatiratanga, te whakapiki i te aroā me te auahatanga i te reo Māori.  

Hei tā Ngahiwi Apanui-Barr, te Tumu Whakahaere o Te Taura Whiri, ko te hāpai i te mana o te reo Māori te kaupapa matua o Ngā Tohu Reo Māori.  

“E whakamihi ana ā mātou tohu i ngā hautupua, ngā whakahaere me ngā kaupapa e whakarauora ana i tō tātou reo huri noa i ngā hapori, i te rāngai tūmataiti, i te rāngai mātauranga, ā ki tua atu anō hoki - kia aha? Kia mauriora te reo!    

"E noho takohanga ana tātou katoa mō te whakarauora i tō tātou reo i te mea hoki, ko te reo Māori te reo ake o Aotearoa." 

“Mā ēnei tohu e whiti ai te rā ki te hunga e whakatutuki ana i ō rātou moemoeā - e māori ai, e ora ai te reo Māori i ia rā, i tōna ake whenua a Aotearoa, arā hei reo mō ake tonu atu - ake, ake, ake."  

Ka whakanuia ngā toa reo Māori ki tētahi pō whakahirahira ā te 7 o Noema 2025, i Te Whanganui ā-Tara. 

Tautapatia he tangata, he whakahaere, he kaupapa rānei i tēnei rā tonu!  

• Kua tuwhera ngā tautapanga tae noa ki te 11.59 pm o te 29 o Hune, haere ki tō mātou paetukutuku kia oti i a koe tō tautapatanga i tēnei rā tonu tetaurawhiri.govt.nz  

• E pā ana ēnei tohu ki ngā mahi i tutuki i waenga i te 1 o Mei 2024 me te 1 o Mei 2025.  

• E āhei ana koe ki te tautapa i te tangata, i te kaupapa, i te whakahaere rānei.