E poho kererū ana Te Taura Whiri i te Reo Māori ki te pānui i tana whakawhiwhinga ki te Tohu Rauwhero i Ngā Tohu Tuhi Pūrongo o Ahiterāhia 2025 (ARA) mō tana Pūrongo ā-Tau 2023/2024.

E whakamihi ana tēnei tohu i te pūmau a Te Taura Whiri ki te puatatanga, te haepapatanga, me te kairangitanga i te tuhi pūrongo tūmatanui. E kauanuanutia ana ngā Tohu ARA, kei tōna tau 75 ināianei, huri noa i te ao whānui mō te whakatairanga i ngā paerewa tiketike i te tuhituhi i ngā pūrongo ā-tau huri noa i te rohe o Ahiterāhia

"Kei te tino harikoa mātou. Hāunga i te whakaputa i ētahi pūrongo e tutuki ana i ngā paerewa tuhi pūrongo ngaio, kua whakamihia hoki mātou i ā mātou whakapaunga kaha kia aro tonu ki te hiki haere i ā mātou mahi, ā, kia rangatira ā mātou mahi ki te tautoko i te reo Māori, te rāngai tūmatanui, me ngāi Aotearoa katoa", te kī a Ngahiwi Apanui-Barr, Tumu Whakahaere o Te Taura Whiri.

I tana pūrongo, ka whakaohoohotia e Te Taura Whiri te wairua o te reo: mai i te hunga e kōrero ana i te reo i ia rā, i ia rā, tae atu ki ngā rangapū mahitahi, ngā haumitanga, me ngā kaupapa e tautoko ana i te reo. E whakaatu ana te pūrongo i te whānuitanga o ngā mahi i tutuki i Te Taura Whiri i roto i te kotahi tau mā te whakamahi i ngā rangahau whakapūaho, ngā raraunga me ngā māramatanga, waihoki, ka whakatakotoria ngā pānga o aua mahi katoa ki te anamata o te reo me Aotearoa.

Ka aromatawai te Tohu Whānui a ARA (General Award) i ngā pūrongo ki ngā paearu torowhānui tae atu ki te kāwananga, ngā pūrongo pūtea, me te tauwhitinga o te tutukinga ā-whakahaere me te rautaki. E whakaata ana te whiwhinga o te Tohu Rauwhero i te pakari o te tūtohu ki ēnei paerewa.

I whakamihi ōkawatia ngā toa i te Pō Tuku Tohu mō te Huritau 75 o ARA i te 29 o Haratua 2025 i Poipiripi, Ahitereiria.

"He huarahi whai tikanga tā mātou pūrongo ā-tau e whakaatu ai mātou i te āhua o ā matou mahi mō te hapori, te tautoko i te reo Māori, me te mahi i runga i te pono. Nō mātou te hōnore kia whakanuia ā mātou mahi i tēnei kaupae", te kī a Ngahiwi.