Ko Te Matatini Society Incorporated te rōpū whakahaere ā-motu i Aotearoa e haepapa ana ki te poipoi, ki te whakawhanake, me te tiaki hoki i ngā mahi a te Rēhia.

Ko tā tēnei rōpū whakahaere he whakahaere i Te Matatini. Ka tū mai tēnei taiopenga i ia rua tau, ā, koia nei te whakanui rahi rawa i te kairangi o ngā mahi a te Rēhia i te ao. E whakatinana ana te taiopenga nei i te mauri me te reretau o te Kapa Haka i tōna taumata tiketike rawa. Ka whakataetae ngā kapa nō Aotearoa me Ahitereiria ki te toa i te taonga māpuna o te Toa Whakaihuwaka ā-Motu. 

He whaitake ngā kapa haka ki te whāomo, ki te whakaora hoki i te Māoritanga, me te reo, me ngā tikanga tuku iho. Ko tāna he whakatairanga i te ako me te mārama ki Te Ao Māori, me āna ritenga tuku iho me ngā uara. He wāhi nui hoki tōna ki te whakarauora i te reo Māori. 

Ko tā te kapa haka he poipoi i te tuakiri me te whakatūturu ka tukuna iho tō tatou ahurea whai tikanga ki ngā uri whakaheke. Ka nanaiore Te Matatini Society Incorporated ki te whakaahei i ngā minenga katoa, kōhanga mai, kaumātua hoki, kia whai wheako kapahaka tūturu nō te mea he pai tōna panga ki te hauora me te oranga ā-pāpori o ngā whānau.

Ko tā te kapa haka he whakatairanga ake i te oranga tinana, hinengaro hoki. Ka nui ake te pakari o te tangata i ngā koringa ā-tinana i te kapa haka, waihoki, ka whakareia ake te hauora hinengaro, manawaroa kare ā-roto hoki i te whakawhanaungatanga me te poho kererūtanga ki te ahurea.

“He kaingākau tuku iho te kapa haka, ā, e tuwhera ana hoki ki te katoa e hiahia ana ki te uru mai. Ka taea e ngā kaumātua rātou ko ngā pakeke ko ngā tamariki ko ngā mokopuna te whakamahi i te kapa haka hei kauwaka ki te ako i te reo me ngā tikanga Māori, me te tūhono atu hoki i ngā whānau me tō rātou hapori huri noa i a rātou,” te whakamārama mai a Carl Ross Te Manahautū nō Te Matatini Society Incorporated. 

He mea tautoko nā Te Matatini te tohu Tū Rangatira mō Ngā Tohu Reo Māori 2024 hei whakarangatira i ngā mahi a te hunga me ngā pūtere e ōrite ana ngā whakakitenga, ā, e uara ana hoki i te whai i te kounga mō ngāi Māori.