Te Panekiretanga o te Reo

Nō ngā rangi tata tonu nei tonoa ai ahau kia tuhi kōrero mōku anō hei whakaawe i te hunga rangatahi. Kāore au i pai ki tēnei whakaaro heoi anō mēnā tētahi ka whakaawetia e ēnei kōrero āku, he pai ake pea tērā i te kore, nē hā? Nō reira . . .

I whānau mai ahau i te iwa tekau mā rua, ā, nā ōku mātua ahau i tuku ki te Whare Kōhungahunga o Ahumairangi. Koirā tētahi o ngā kōhanga reo o te Whare Wānanga o Wikitōria. Nōku te waimarie i whai wāhi atu ahau ki te kaupapa o te Kōhanga Reo.

Ka rima tau taku pakeke, ka uru atu ahau ki te Kura o Ōtari. E toru ngā wāhanga o te kura nei. Ko te wāhanga Montessori, te wāhanga auraki me te wāhanga reo rūmaki. Katoa taku whānau i uru ki roto i te wāhanga reo rūmaki, ā, i noho ki reira mō te katoa o te kura tuatahi.

I te tau 2005 ka whai au i ngā tapuwae o aku pāpā, ka tīmata ki Te Aute Kāreti. I konei ka poipoia taku ngākaunui ki te reo Māori, ka kite hoki ahau i te ao e whanga ana ki te hunga, pēnei i a au, e hīkaka ana ki te whai i te reo Māori ki tōna teiteitanga. Nō te tau i mua i huakina ai ngā kuaha o Whakaata Māori, ā, ko te tauira o mua o Te Aute, ko Julian Wilcox tētahi o ngā mata rongonui o Whakaata Māori. Katoa mātou ko ōku hoa i pīrangi ki te whai i ōna tapuwae, me te aha me mihi ki a ia i te mea i rite tonu tana hokihoki mai ki te kura ki te akiaki i a mātou, ki te tautoko anō hoki i ngā tini kaupapa o te wā.

Ka mutu taku rima tau i Te Aute, ka hoki ahau ki ōku mātua, otirā ki te Whare Wānanga o Wikitōria ki reira ako ai. I konei ka whai au i te tohu paetahi me te tohu hōnore i roto i te reo Māori. Nōku i te whare wānanga i te mahi hoki ahau i te Reo Irirangi Māori o Te Ūpoko o Te Ika hei kaipāho. Nōku te whiwhi i tūtaki au ki ētahi tino kaiwaiata o te ao Māori.

I tino hiahia ahau ki te whakapakari i taku reo kia rite ki te hunga pēnei i a Te Manahau mā, nō reira ka rēhita au mō tētahi kura reo i toku hau kāinga, i Te Matau a Māui. Nā Ngāti Kahungunu Iwi ngā karahipi i tuku mai - nō mātou te hōnore nui. I tēnei kura reo i tuwhera ōku whatu ki te ao whānui o te reo Māori me ōna āhuatanga katoa.

Ka rere te wā, ka pōhiritia ahau e Te Panekiretanga o te Reo Māori. Kāore au i tino mōhio ki te kaupapa nei heoi e ai ki ngā kōrero a ōku hoa, kāore he wānanga i tua atu mō te whakamātau i te kounga o tō reo. Mutu ana te wānanga tuatahi, i tino mārama ahau ki tā rātou i whakapae ai. Ka mutu ngā wānanga, ka puta te ihu, ka tau te mauri (āhua tau nei).

I ēnei rā he kaiwhakaako reo Māori ahau ki Te Ūranga Waka (te wāhanga Māori o EIT). He rite tonu taku āwhina i te hunga pēnei i a Tātere MacLeod me ngā kaupapa whakarauora reo a Ngāti Kahungunu. Kua tū ahau hei māngai mō tōku iwi, mō Ngati Kahungunu ki te Koroneihana. Nō taua wā i ū a Ngāti Kahungunu ki tā mātou i whakatau ai, arā kia tū ko tētahi tangata āhua rangatahi nei hei kaikōrero mō te iwi, hei kaipupuri hoki i te mauri o te iwi i mua tonu i ngā iwi o te motu.

Kei kīia au he kūmara, e ōku kaiako me ōku hoa, ko ōku pūkenga he mea whāngai e rātou kia puāwai ai i roto i ngā tau. Nā rātou ngā āhuatanga o te ngākau whakaiti i whakatinana hei whaiwhai ake māku. E kore rawa aku mihi e maroke i te rā, e puehuehu rānei.

A kāti, kia hoki atu ki te take i tuhia ai ēnei kōrero. E te hunga rangatahi, kua roa te iwi Māori e mea ana ko tātou ngā rangatira o āpōpō. Nō reira me kaha ake tā tātou whai kia rangatira te āhua o ngā rangatahi āpōpō. Me timata i te rā nei, ka whati te tai ka pao te tōrea. Ki te waiho mō āpōpō, e kore tētahi paku aha e hua ake i a tātou. Kei roto i a tātou ngā te toto rangatira, waihoki whakamanahia! Hoatu tō katoa, ahakoa te kaupapa. Ko te hoariri o pitomata, ko hāneanea. Koirā noa iho tāku. Ko te ao kei mua tonu i a koe, ko tāu he kapo ake.

 


Kāti, ko tā He Muka he whakaputa kōrero ki te reo Māori. Ko ngā tirohanga, whakaaro rānei kei roto i te tuhinga nei he mea whaiaro nō te tangata nāna te kōrero i tuhi. Ka mutu, kāore i te whakaatu i ngā whakaaro o, i ngā kōrero a, rānei, Te Taura Whiri i te Reo Māori, āna kaimahi, tana pae whakahaere, tana poari rānei, tae atu rā ki ngā tari, ngā pakihi rānei e whai pānga ana ki Te Taura Whiri i te Reo Māori, ahakoa te hononga, hāunga i ngā mea kua āta whakahuatia ake ai.  Ehara ēnei tirohanga, whakaaro, kōrero rānei i te mea whakaiti, whakahē rānei, i te iwi, i te hapori, i te rōpū, i te tari, i te pakihi, i te tangata rānei.