I mihi Te Taura Whiri i te Reo Māori ki te rangatira, Tā Wira Gardiner
I mihi Te Taura Whiri i te Reo Māori ki te rangatira, Tā Wira Gardiner i te rangi nei.
“He rangatira a Tā Wira i ngā rangi katoa i takahia e ia te mata o te whenua. Mai i te pae o te pakanga, te rūma Poari tae noa atu ki te paepae. Ka rongo te motu katoa i te mamae i te mea mahue mai i a ia he whakareretanga i huri ai te pāpori o Aotearoa,” hei tā Ngahiwi Apanui, tumu whakahaere o Te Taura Whiri i te Reo Māori.
“He motuhake a Tā Wira i te mea ko ia tērā e kōkiri whakamua ana ahakoa te uaua, te māmā rānei o te kaupapa. Pērā anō hoki tana whai kia ako i te reo Māori. Nonā i tohua hei tumu whakahaere mō Te Puni Kōkiri, kāore i a ia te reo, nōna i mutu ai kua mōhio ia ki te kōrero.”
“Nā āna mahi i whakaatu mai ia, ahakoa te pakeke o te tangata mēnā e ngākau titikaha ana te tangata ka mau i a ia tō tātou reo. Tae atu hoki ki te tumu whakahaere e whakaiti nei i a ia ki te ako i ētahi mea hou.”
“Ko tā Wira i tohutohu ai ki ētahi anō i whakaatu i āna tikanga hāngai ki te whakatutuki kaupapa ahakoa te wero: “Kaua e whakamā. Kaua e wehi kei hē tātou, mā te hē e tika ai te kōrero i te reo. Mēnā e taea ana e te koroua pēnei i au nei: ka taea e te katoa.”
Kāore he tangihanga mōna i tēnei wā i runga anō i Tā Wira i tono ai kia haumaru te hapori me ngā kaimahi e mahi ana i te mura o te ahi.
“Ahakoa kua ngaro i te tirohanga kanohi, kei te whakaatu tonu mai a Tā Wira i te rangatiratanga tūturu.”