Kua mana ngā rā o Te Wiki o te Reo Māori, 2023.

E hurō ana a Te Taura Whiri i te Reo Māori ki te pānui kua mana ngā rā o Te Wiki o te Reo Māori, 2023.

Kuhuna tēnei ki tō rātaka nā te mea hei te Mane, te 11 o Hepetema, ka tū ai Te Wiki o te Reo Māori atu ki te Hanare te 17 o Hepetema. 

Whakahaeretia ai te kaupapa nei, o Te Wiki o te Reo Māori, e Te Taura Whiri i te Reo Māori i ia tau hei whakatairanga i te reo Māori hei reo mō ngā kirirarau katoa o Aotearoa. I ia tau ka whakamānawa atu mātou i ngā whānau puta noa i Aotearoa, tae atu ki ngā whakahaere, ki ngā kura, ngā wāhi mahi me ngā kāinga, kia whakamātauria e rātau te reo Māori.

Ka rere tonu te kaupapa, 'Kia Kaha Te Reo Māori', i tēnei tau, e whaiwhai ana i te whiore o te tau 2022. He wāhi nui tō te kaupapa nei e tutuki ai te whāinga kia 1 miriona ngā kaikōrero i te reo Māori hei te tau 2040.