I tēnei tau, e ahu ana Te Wiki o te Reo Māori ki tō tāone! 

I raro i te kaupapa o Ake, Ake, Ake – Mō Ake Tonu Te Reo Māori, ko te aronga i 2026 ko Tāone Reo Māori - he whakamānawa i ngā hapori nā rātou i ora ai te reo Māori, ā, he pōhiri i a Ngāi Aotearoa whānui ki te āwhina kia tōnui ai ia ki te anamata rā anō. 

Mai i ngā kāinga kōrero Māori, ki ngā hapori e tīmata ana i ngā ara reo, he wāhi tō ia tāone, ia tiriti, ia wāhi mahi, ia marae, i te āpōpō o te reo Māori. Tāone nui rānei, tāone iti rānei, mō te katoa te reo Māori. 

He pōhiri ki te motu 

E pōhiri ana a Te Taura Whiri i te Reo Māori me Te Mātāwai i ngā tāone puta noa i te motu ki te mairanga i te reo Māori kia rangona ai, kia kitea ai, kia ora ai hoki i Te Wiki, ā, ā tua atu. 

Ko te pūtake o Tāone Reo Māori ko te whakamihi i ngā hapori maha e para kē ana i te ara, me te āki hoki i ētahi atu kia koke mai. Ko tāna, he whakanui i ngā kura, i ngā karapu hākinakina, i ngā pakihi, i ngā marae, i ngā whānau me ngā hapori kua raranga iho i te reo ki ngā mahi o ia rā, haere he reanga, haere he reanga. 

Nanao mai ki tēnei pōhiri ki te whakanui i te reo  ki tāu e pai ai. Ko te tikanga o te 'Tāone Reo Māori' ko te whai wāhi me te hora i te aroha ki te reo Māori. Mā ia mahi auau, nui mai, iti mai, e pūmau ai ngā huringa. 

Ka whakanui mātou i ngā hapori e para kē ana i te ara, tae atu ki ngā tāone reorua pēnei i a Kerikeri, i a Ōtaki, i a Rotorua me Te Wairoa, e noho kē ana te reo Māori ki te ia rā. 

He kaupapa tō ia rā o Te Wiki arā, 'te reo me ngā whānau', 'te reo i ngā pakihi',  'te reo i ngā hākinakina'... Nō reira, nau mai Aotearoa - huatakitia tō Tāone Reo Māori ināianei! 

Ko te pūtake ko te whakarite i tētahi anamata e  taunoa ai, e kitea ai, ā, e kaingākautia ai  te reo Māori i ngā wāhi katoa. 

Tohua tō tāone hei 'Tāone Reo Māori' 

Ko te āpōpō o te reo Māori,  kei ō tātou ngākau, kei ō tātou kāinga, kei ō tātou hapori. Nō reira, whakaritea tōu 'Tāone Reo Māori' ake kia motuhake ai ki tō hapori. 

Whakahaerehia  he taiopenga mō te rā whakarewa, peitahia  he matarahi heitiki,  mānawatia te kapa haka, whakairihia ngā tohu reorua,  mihia ngā kiritaki i te reo Māori, whakamahia ngā kupu Māori i te papa tākaro, tuarihia ngā pūrākau me ngā hītori o te takiwā, whakanuia ngā tikanga reo tuku iho e kaha kē ana i tō hapori, kawea rānei te reo Māori ki tō karapu hākinakina me ō whare pukapuka - he mutunga kore ngā kōwhiringa! 

Ahakoa tō tāone kei te taumanu i te reo, kei te whakatipu i te reo, kua roa nei rānei e kawe ana i te reo i roto i ngā whakatipuranga, he takoha tā ia hapori kia ora mō ake tonu te reo. 

Pūrena ana a Reomaori.co.nz i ngā rauemi me ngā whakaaro e tīmata ai koe. Kia kaha te reo Māori!