Te reo Māori i ngā pūkoro o ngāi Aotearoa i ia rā, i ia rā

Ko Kūkara tētahi o ngā umanga hangarau whai mana o te ao, e mōhiotia ana mō tana pūrere rapu, āna hua matihiko me ngā auahatanga o te Hinengaro Rorohiko (AI), te rorohikotanga ā-kapua, me ētahi atu. Hei wāhanga o ā rātou mahi auaha, kua tahuri a Kūkara ki te whakapiki i tōna tautoko mō ngā reo taketake, tae atu ki tō tātou taonga ā-motu - te reo Māori.
I tīmatahia a Kūkara i te tau 1998 e Larry Page rāua ko Sergey Brin. Ko te mea i tīmataria hei kaupapa pūrere rapu i tere panoni ai a Kūkara ki tētahi o ngā umanga hangarau momoho, whai mana hoki o te ao.
I konei i Aotearoa, kua tuituia a Kūkara ki roto ki ā tātou mahi o ia rā, ā, e tautoko ana hoki i te whakamahinga o te reo Māori. Mai i te kūkara i te Te Aka, te whakamahere i te huarahi ki Taupō, te whakamāori i te kupu, te rerenga Māori rānei, ki te tuku i tētahi īmēra me te hanga i te pōhiri maramataka ki te reo Māori - he wāhi nui tō Kūkara i te whakaritenga aratuku me te whakaaturanga o ngā mōhiohio mō tō tātou reo.
He nui ngā momo tautoko a Kūkara i ngā kaupapa kōkiri reo Māori:
- Kua whakamahia te reo Māori mā te Whakawhiti Reo Kūkara mō te āhua 10 tau
- I tautokona e Kūkara te whakawhanaketanga o te taupānga Kupu, he mea e āhei ai koe ki te whiwhi i te kupu reo Māori mā te whakaahua noa
- Kua whakatau hoki a Kūkara ki te whakapai ake i te whakahua o ngā ingoa wāhi reo Māori
- Kua tautoko rātou i te whai wāhi atu me te ako o te reo Māori mō ngā kaimahi i Kūkara Aotearoa
- Kua whakawhanakehia ngā Utauta Whakauru a Kūkara, hei whakangāwari i te tāpiritanga o ngā tohutō ki ō tuhituhi i runga i te Chromebook
- I te tau 2023, i waitohua e Kūkara me Te Taura Whiri i te Reo Māori he Whakaaetanga Mahitahi, e whakamana ana i te mahitahitanga a ngā whakahaere e rua ki te whakapiki i te reo Māori me te whai wāhitanga ki te reo Māori.
I te tau 2024, i tautokona ā-pūtea e Kūkara te Tohu Ao Matihiko i Ngā Tohu Reo Māori. Mā te tautoko ā-pūtea i te wāhanga matihiko, ka whakatairangahia e Kūkara te tūhononga o te hangarau me te reo hei reo o ia rā, o ia rā. E whakaatu ana tēnei wāhanga o Ngā Tohu Reo Māori i ngā kaupapa auaha e whakamahi ana i ngā aratuku matihiko ki te whakatairanga me te whakarite i te reo Māori hei reo o ia rā, o ia rā. He mea tino māori nei te whakapiri atu ki tētahi o ngā umanga hangarau tōnui o te ao ki te whakanui i ngā toa whakaihuwaka kei te mura o te ahi mō te whakaritenga o te reo Māori hei reo o ia rā, o ia rā i te ao matihiko.
E mauria mai ana e Kūkara te reo Māori ki ngā pūkoro o ngāi Aotearoa i ia rā, i ia rā. E koa ana mātou ki te mahi tahi ki Kūkara hei hāpai tonu i ō mātou toa whakaihuwaka mō te reo Māori ki te ao auaha hangarau e tū mai nei mō tēnei reo mana ā-ture o Aotearoa.