E mihi ana ki ngā wāhine i whai kia kaha tonu ai te reo Māori
Kia kaha te reo Māori: E mihi ana ki ngā wāhine i whai kia kaha tonu ai te reo Māori
Kua puta te tautoko a te Kaikōmihana Reo Māori i te taitamāhine i taunutia e te kiritaki ki tētahi wharekai i Tāmaki.
“E whakatinana ana a Mia Griffiths o Tāmaki i te kaupapa o Te Wiki o te Reo Māori: ‘Kia Kaha te Reo Māori’, hei tā Ahorangi Rawinia Higgins, Te Kaikōmihana mō Te Reo Māori.
“E tū whakahīhī ana mātou i tēnei taitamāhine i whakaatu i te mana ahakoa te tūkino: E ora tonu ana te reo Māori i te kaha ū o te wahine toa kia kaha tonu ai te reo Māori ahakoa te uaua: Ko Mia tētahi.
E takatū ana te manomano ki te whakanui i Te Wiki o te Reo Māori (Rāhina 9 – Rātapu 15 Mahuru). 17,000 ngā tāngata kua rēhita kē ki ngā hīkoi whakangahau ki Pōneke, ki Whangarei, ki Takapuna, ki Tūranga, Ki Maungakiekie, ki Manukau me Kirikiriroa.
“He ora, he hihiri, he rangatira anō hoki te reo Māori e wāriutia ana e ngā tāngata katoa ahakoa ko wai, nō hea, te pakeketanga hoki. I tērā tau i puta i te New York Times te kōrero mō ngā kainoho ki tētahi whare kaumātua i Ōtautahi e ako ana i te reo Māori. I puta i tētahi kuia Pākehā, 93 ōna tau, tōna pouri nui i tōna kore mōhio ki te kōrero Māori.”
“Kua 35 ngā tau mai i te wā, i whakamōrea te wahine toa a Naida Glavish i tana mahi i Te Poutāpeta mō te whakamahi i te mihi ‘Kia ora’ kaua ko ‘Good Morning’.”
“I whakaatu ngā tokorua nei i te mana me te huatau: i mahi anō hoki rāua kia kaha tonu ai tō tātou reo Māori. Kia Kaha te Reo Māori.”
“I whakaatu te manomano o te tangata i tō rātou tautoko i a Mia i ngā rā tata nei, ā e karanga atu ana kia honohono mai rātou ki te whakanui i Te Wiki o te Reo Māori 2019”, te kī a Ahorangi Higgins.