Ko Whakaata Māori te rōpū whakahaere pāho taketake ā-motu o Aotearoa. E noho pūmau ana ia ki te whakarauora, ki te whakamana hoki i te reo Māori, i te ahurea Māori me te tuakiri mā te pāho kōrero.  E ārahina ana a Whakaata Māori e te whakakitenga, kia mauriora te reo – arā, he anamata e kōrerotia ana te reo i ngā wāhi katoa, I ngā rā katoa. E poipoi ana a Whakaata Māori i tētahi taiao e momoho ai te reo me ōna tikanga tuku iho.

E hono atu ana a Whakaata Māori ki ngā minenga i Aotearoa me tua atu hoki, mā ngā pūwhara utukore, matihiko hoki. Ka pāhotia ngā hōtaka e whakanui ana, e tiaki ana, e whakanoi ake ana i te reo me ngā tikanga Māori. E whakatūturu ana a Whakaata Māori ka tōnui, ka wātea hoki te reo me te ahurea Māori ki te katoa mā ngā kaupapa pāho kōrero whai mana pēnei i te rumaki reo me te tukunga iho o te reo.

Mō te 21 tau, kua pāpāho a Whakaata Māori i ētahi hōtaka e tino maimoatia ana i Aotearoa. Kua hono a Whakaata Māori i ngā minenga ki ngā kōrero e whakanui ana, e whakatairanga ake ana i te reo Māori me te ahurea Māori. Mai i ngā hōtaka rongo kōrero e whakaponohia ana me ngā take nunui o te wā, ka pāpāhotia ngā taiopenga tāpua o te ao Māori tae atu ki ngā kaupapa whakanui ā-motu pēnei i Te Rā Whakamahara ki ngā Hōia o Ahitereiria me Aotearoa me Te Rā o Waitangi. E whakarite ana a Whakaata Māori ka noho mātāmua mai te whakaaturanga o ngā tirohanga Māori.

He wāhi nui hoki tō Whakaata Māori ki te whakaatu i te tōnuitanga o ngā mahi a te Rēhia, i ngā whakaari, me ngā whakangahau, me te tautoko i te pāho kōrero a ngā rangatahi. Waihoki, ka whakaratoa he pūwhara mō ngā iho pūmanawa pitomata. Ka whakapoapoa tonu a Whakaata Māori i ngā minenga me te whakapakari i te awenga o te reo huri noa i ngā pūwhara katoa, mā te pāho i ngā hākina mataora, me ngā pāpāho huriao, mā te matihiko auaha hoki.

“I tuku mai ki a mātou te haepapa ki te pāho i ngā kōrero tōnui o onamata, o inamata o anamata o te ao Māori ki te ao whānui. He mana tō ngā kōrero e pāhotia ana e mātou i te rangi nei ki te hanga i te motu – arā, te whakatō i te poho kererūtanga, te whakaohooho i te tuakiri, me te whakaawe i ā tātou tamariki me ngā uri whakatupu o anamata i te āhua e kite ana rātou i a rātou anō, tae atu ki te āhua e kite atu ana te ao i a rātou. Ko te whai wāhi atu ki Ngā Tohu Reo 2024 tētahi o ngā huarahi huhua e whakanui ana, e whakamihi atu ana hoki mātou i te hunga e whakapakari ana i te reo Māori mō anamata,” te kī a Kaihautū Shane Taurima. 

E tautoko ana a Whakaata Māori i Ngā Tohu Reo Māori 2024, hei hoa haere kōtui poho kererū i Te Whare o te Reo Mauriora, ki te whakamānawa i te hunga me ngā pūtere e manawanui ana ki te whakarauora, me te whakataunoa hoki i te reo.