He kāhui toa manahau i eke ai ki te atamira i Ngā Tohu Reo Māori 2025 i Te Whanganui-a-Tara i tēnei pō.

He mea whakahaere nā Te Taura Whiri i te Reo Māori, ko tā te kaupapa he whakanui i te hunga e kawe ana i te reo Māori ki te anamata.

"He hōnore nui ki a mātou ki te whakanui i te hunga ārahi, whakaohooho, tārai hoki i tētahi anamata mō te reo Māori," te kī a te Tumu Whakahaere, a Ngahiwi Apanui-Barr. "Ahakoa he mahi hākinakina, hapori, ao matihiko rānei - e whakamahara ana ngā toa i a tātou mā te kōrero, te kite, te rongo hoki i te reo e ora ai te taonga nei."

Tokowaru ngā kaiwhiwhi i whakanuia mō tō rātou wairua auaha, whakakitenga, ngākau titikaha ki te reo Māori. E hāngai ana ngā wāhanga tohu hou ki ngā pou o te whakarauora reo e mōhoitia ana huri noa i te ao. E whakamihi ana ērā i te manawanui ki te whakamahi i te reo i ia rā, i ia rā, me te whanake kupu hōu, te ārahitanga me te whakaohooho i te marea.

I whakawhiwhia Te Tohu Oranga Angitu ki a Piripi Walker (Ngāti Raukawa ki te Tonga) mō tāna āta whakaawe i te ao reo Māori. Tētahi o ngā tāngata nāna nei a Te Upoko o te Ika i whakatū, te pou reo irirangi Māori tuatahi o Te Whanganui-a-Tara, he hēkeretari hoki mā Ngā Kaiwhakapūmau i te Reo Māori i te wā o te kokoraho whakahirahira, o WAI 11, e rarangā ana te awenga nui a Piripi i ngā mahi whakarauora reo i roto i ngā tau maha.

"Nā Piripi i para te huarahi mō ngā panonitanga puri mahara, nāna hoki ētahi atu i whakamana ki te kawe tonu i te reo ki mua," te kōrero a Ngahiwi. "E whakamahara mai ana tana waihotanga ka taea tonutia e te kaiārahi pono te ngākau māhaki me te aronga whakaumu."

I whakawhiwhia Te Tohu Tū Rangatira (arā, Te Tohu Whakaharahara o Tū Rangatira) ki a Lorraine 'Nanny Lolo' Pirihira Hale (Ngāti Awa) nō Te Kōhanga Reo o Te Teko, kua roa atu i te 40 tau tāna whakapau kaha ki tōna hapori. E whakakanohi ana i a Mātaatua - Tauranga Moana ki te Poari Matua o Te Kōhanga Reo, e whia tonu ngā whakatupuranga i whakaohoohotia ai e ia kia ora, kia ako hoki i te reo Māori i ia rā, i ia rā.

"He wahine tēnei e aro nui ana ki ngā mokopuna, whānau me te reo i āna mahi katoa - e wāwāhi ngaru nui ana e taea ai e te tangata te ako tōna reo," e ai ki tā Ngahiwi.

Ko ētahi toa ko Tākuta Hona Black rātou ko Aukaha News ko Arataua Media ko Auckland Transport ko Hākinakina Rangatahi ko te tira kaiwhakamāori o te pūtere auaha ko Te Reo Māori ki Parī 2024 - ko ia te papakupu whāiti hākinakina Taumāhekeheke reorua tuatahi rawa.

"Ko tā ia toa me te hunga i eke ki te whiringatoa he tohu ki a tātou e ora ana, e tupu matomato ana, e tino arohaina ana hoki tō tātou reo," te kī a Ngahiwi.

E whakamihi atu ana a Te Taura Whiri i te tautoko a Te Māngai Pāho, Whakaata Māori, Te Tāhuhu o te Mātauranga, Fonterra, Te Puna Kōkiri, Toi Aotearoa, Te Matatini me Te Mātāwai.

Pānui haere >